ភ្នំពេញ៖ រដ្ឋមន្ត្រីក្រសួងសាធារណការ លោកទេសរដ្ឋមន្ត្រី ស៊ុន ចាន់ថុល ថាមូលហេតុដែលធ្វើឱ្យផ្លូវជាតិលេខ៣ កំពត-វាលរេញ ចំនួន ២០គីឡូម៉ែត្រមានការលំបាក និងខូចខាតច្រើនដោយថាស្ថានភាពដីស្អុយ និងទន់ ដោយលោកគ្រោងធ្វើស្ពានដាក់ពីក្រោមផ្លូវទើបជាប់។

ថ្លែងនៅក្នុងកិច្ចប្រជុំថ្លែងក្នុងពិធីបូកសរុបលទ្ធផលការងារសុវត្ថិភាពចរាចរណ៍ផ្លូវគោកប្រចាំឆ្នាំ២០២១ នាថ្ងៃទី០៩ ខែកុម្ភៈ ឆ្នាំ២០២២ លោក ស៊ុន ចាន់ថុល បានបញ្ជាក់ថាដើម្បីបញ្ចប់ភាពច្រំដែលនៃការសាងសង់ចុះឡើងលើកំណាត់ផ្លូវជាតិលេខ៣ខាងលើ លោកគ្រោងចាក់គ្រឹះ១៨ម៉ែត្រចូលក្នុងដីធ្វើស្ពានបង្កប់ពីក្រោមមុននឹងក្រាលផ្លូវពីលើ។

លោកថា៖ «ផ្លូវនេះតាំងពីសម័យសង្គមរាស្រ្តនិយមក៏ធ្វើមិនដែរបានជាប់ដែរ ដោយសារដីវាស្អុយ ដីវាទន់ ប្រហែល ១៨ គីឡូម៉ែត្រ មាន៥ គីឡូម៉ែត្រនៅ វាលរេញ ដូច្នោះដើម្បីធ្វើផ្លូវនេះឱ្យជាប់យើងត្រូវតែវាយ ត្រូវតែខួង ធ្វើគ្រឹះ ១៨ ម៉ែត្រ ហើយធ្វើស្ពានក្រោមដីទើបវាជាប់ បើមិនចឹងទេធ្វើមុខខូចក្រោយ ធ្វើក្រោយខូចមុខហើយ»។

លោកបានបន្ថែមថា ក្រសួងសាធារណការក៏បានឯកភាពគ្នាជាមួយក្រសួងសេដ្ឋកិច្ច និងហិរញ្ញវត្ថុដើម្បីស្នើរទៅប្រទេសចិននៅឆ្នាំ២០២៣ ជួសជុលជាបណ្តោះអាសន្នសិន ទម្រាំបានថវិកាពីចិនបន្ថែមដើម្បីស្តារកំណាត់ផ្លូវនេះឱ្យបានត្រឹមត្រូវតាមបច្ចេកទេស៕